१६ हजार पेक्षा जास्त मते मिळवून देणार असल्याची ग्वाही वास्कोचे आमदार कृष्णा साळकर यांनी दिली.

वास्को(प्रतिनिधी) दक्षिण गोव्यात लोकसभा निवडणुकीत भाजपचा उमेदवार मोठ्या मताधिक्याने निवडूण येणार आहे.मुरगाव तालुक्यातील वास्को मतदार संघातून भाजप उमेदवाराला १६ हजार पेक्षा जास्त मते मिळवून देणार असल्याची ग्वाही वास्कोचे आमदार कृष्णा साळकर यांनी दिली.
भारतीय जनता युवा मोर्चा , नमो युवा चौपाल ( चाय पे चर्चा) कार्यक्रम वास्को बसस्थानकावर पार पडला. यावेळी वास्कोचे आमदार कृष्णा साळकर यांच्या समवेत गोवा भाजप युवा मोर्चा अध्यक्ष समिर मांद्रेकर, राज्य मानव संसाधन विकास मंडळाचे उपाध्यक्ष तथा वास्को भाजप गटाध्यक्ष दिपक नाईक, मुरगावचे नगराध्यक्ष गिरीश बोरकर, नगरसेविका शमी साळकर, दक्षिण गोवा भाजप युवा मोर्चा सचिव किरण नाईक, वास्को भाजप युवा मोर्चा अध्यक्ष अमय चोपडेकर, प्रशांत नार्वेकर, संदीप नार्वेकर, दिलीप काजळे, माजी नगरसेवक अनिल चोपडेकर, माजी नगरसेविका रोचना बोरकर व इतर पदाधिकारी, नागरीक उपस्थित होते.
देशाचे पंतप्रधान नरेंद्र मोदी यांनी आर्टिकल ३७० हटवून जम्मू काश्मीरला खऱ्या अर्थाने न्याय मिळवून देण्यासाठी महत्वाचे पाऊल उचलले आहे. केंद्र सरकारच्या मागदर्शनाखाली गोव्यात मोठ्या प्रमाणात विकासकामे मार्गी लागत आहे. दक्षिणेत भाजप उमेदवार लोकसभा निवडणुकीत यश संपादन करून ४०० पार मध्ये महत्वाची भूमिका बजावणार असल्याचे आमदार कृष्णा साळकर यांनी सांगितले.वास्को भाजप गटाध्यक्ष दिपक नाईक यांनी केंद्र सरकारच्या योजना विषयी माहिती देताना सांगितले की, प्रत्येकांनी केंद्र व राज्य सरकारच्या योजनाचा लाभ घेणे आवश्यक आहे. मोदी सरकारच्या कार्यकाळात गरीब, मध्यम वर्गीयांना सर्व सवलती प्राप्त झाल्या असून यात आणखीन भर घालण्यासाठी भाजपला येत्या लोकसभा निवडणुकीत ४०० पार करण्याचे आवाहन केले. दक्षिण गोव्याचे काँग्रेसचे खासदार फ्रान्सिस सार्दिन यांनी निवडून येऊन कधीच वास्कोचा विचार केला नाही. खासदार म्हणून सार्दिन सपशेल अपयशी ठरले असल्याची माहिती दिपक नाईक यांनी दिली. याप्रसंगी नगराध्यक्ष गिरीश बोरकर, किरण नाईक व इतरांची मार्गदर्शन पर भाषणे झाली. संपूर्ण कार्यक्रमाचे सूत्रसंचालन सिद्धार्थ कासकर तर आभार प्रदर्शन दामोदर लोटलीकर यांनी केले.
फोटो: वास्को बस स्थानकांवर भारतीय जनता युवा मोर्चा, नमो युवा चौपाल कार्यक्रमात जनतेला मार्गदर्शन करताना आमदार कृष्णा साळकर, बाजूस वास्को भाजप गटाध्यक्ष दिपक नाईक , नगराध्यक्ष गिरीश बोरकर, अमय चोपडेकर व इतर.

newsbabaonline.com